Берзанските индекси паднаа на Волстрит во четврток, бидејќи проблемите во американските регионални банки дополнително ги вознемирија инвеститорите кои веќе беа вознемирени поради трговските тензии меѓу САД и Кина.
Дау Џонс изгуби 0,65 проценти, на 45.952 поени, додека S&P 500 се лизна за 0,63 проценти, на 6.629 поени, а индексот Nasdaq за 0,47 проценти, на 22.562 поени.
Акциите на регионалните банки беа најмногу под притисок вчера.
Цената на акциите на Zions Bancorporation потона за 13 проценти откако регионалната банка објави загуба од 50 милиони долари во третиот квартал, зголемувајќи ја загриженоста на инвеститорите за скриени кредитни проблеми, додека банките се справуваат со економската неизвесност со сè уште релативно високи каматни стапки.
Акциите на Western Alliance Bank, од друга страна, паднаа за повеќе од 10 проценти, откако објави дека поднела тужба за измама против еден од своите клиенти.
Поради сето ова, индексот на финансискиот сектор потона за 2,75 проценти.
„Цените на акциите на некои регионални банки и финансиски институции кои се особено чувствителни на кредити нагло паднаа. Можеби квалитетот на кредитите се влошува“, вели Чак Карлсон, аналитичар во Horizon Investment Services.
Инвеститорите, исто така, ги следат случувањата меѓу Вашингтон и Пекинг, бидејќи трговските тензии меѓу двете најголеми економии во светот продолжуваат да растат.
Минатата недела, американскиот претседател Доналд Трамп се закани дека ќе воведе 100-процентни царини за Кина од 1 ноември, како и други мерки, откако Кина го ограничи извозот на ретки минерали.
„Со продлабочувањето на неизвесноста околу трговијата меѓу САД и Кина, засилената реторика и она што тоа би можело да значи за економијата и пазарите, мислам дека сето тоа придонесува за нестабилност на пазарот“, рече Том Хејнлин, стратег во „У.С. Банк Велт Менаџмент“.