Најважните индекси на Волстрит благо паднаа при претпазливото тргување во понеделникот, откако во јули го постигнаа најголемиот месечен скок во последните две години, додека инвеститорите ги очекуваат клучните податоци за вработеноста во најголемата светска економија за нови насоки.
На почетокот на неделата Dow Jones падна за 46,7 поени или 0,14 отсто, на 32.798 поени, S&P 500 за 0,28 отсто, на 4.118 поени, а Nasdaq за 0,18 отсто, на 12.368 поени.
Така, индексите благо паднаа по минатонеделниот раст, поттикнати од шпекулациите дека ФЕД можеби нема да има потреба да ги зголемува каматните стапки толку агресивно како што некои стравуваа.
Американската централна банка соопшти дека има за цел да ја спречи инфлацијата и да ја намали побарувачката со зголемување на каматните стапки, но некои инвеститори и аналитичари се загрижени дека нејзиното агресивно заострување на монетарната политика може да ја поттикне невработеноста и да ја забави економската активност.
Од почетокот на годината, ФЕД веќе ја зголеми основната каматна стапка за вкупно 2,25 процентни поени и најави дека нејзиниот пристап кон затегнување на монетарната политика и понатаму ќе биде под влијание на индикаторите.
„Сè уште има многу прашања за тоа дали навистина сме излегле од проблемот економски, но веројатно не сме. Не сме ни блиску до економските ефекти од зголемувањето на каматните стапки на ФЕД досега“, вели Том Мартин, портфолио менаџер во инвестициската компанија Global Investments.
Најмногу вчера паднаа цените на акциите во енергетскиот сектор, под влијание на падот на цената на нафтата. Најголем губитник беше акцијата на Exxon Mobil со пад на цената од 2,5 отсто.
Европските берзи продолжија да бележат загуби, под влијание на намалениот апетит за ризик на инвеститорите кои ги зафатија глобалните пазари поради се повеќе знаци на забавување на глобалната економија, како и зајакнувањето на геополитичките тензии меѓу САД и Кина .
Паневропскиот индекс Stoxx 600 беше во минус од 0,7 отсто околу 10 часа, при што повеќето берзански сектори беа во црвено, како и сите најважни берзански индекси. Така, лондонски Ftse индексот ослабе за 0,21 отсто, на 7.398 поени, франкфуртски DAX за 0,79 отсто, на 13.372 поени, а париски CAC за 0,29 отсто, на 6.418 поени.
Нивниот пад продолжува на вториот ден од август, откако европските берзи во јули го забележаа својот најдобар месечен учинок од ноември 2020 година.
