Продажбата на Volvo Cars Group во јули падна за 21,5 отсто во однос на истиот месец во 2021 година, бидејќи проблемите со синџирот на снабдување продолжија да го натежнуваат производството, но може да се вратат на претходното ниво во наредните месеци, соопшти шведскиот производител на возила.
Недостигот на полупроводници и други компоненти го намали производството и продажбата на автомобилската индустрија во последните квартали, но Volvo минатиот месец соопшти дека забележува „значително подобрување“ во стабилизирањето на синџирот на снабдување, објави Ројтерс.
– Под услов нормализацијата да продолжи, компанијата очекува прогресивно да расте производството во наредните месеци. Поради ова очекувано подобрување, компанијата предвидува дека продажбата на мало ќе биде иста или малку помала во цела 2022 година во споредба со обемот во 2021 година – се вели во соопштението за печатот на Volvo.
Целосно електричните автомобили учествуваа со само 3,5 отсто од продажбата на компанијата со седиште во Гетеборг во јули, која планира да оствари 50 отсто од продажбата до средината на оваа деценија.
– За цела 2022 година, целта останува да имаме двоцифрен удел на целосно електрични автомобили во продажбата – додаваат од Volvo.
Продажбата на компанијата во Кина се зголемила во јули за 6,4 отсто, додека во САД е намалена за 40,7 отсто, а во Европа за 29,1 отсто.
