Подрачната единица на Министерството за земјоделство, шумарство и водостопанство информира дека жетвата на јачмен во општините Куманово, Липково и Старо Нагоричане е завршена. Поради високите температури таа годинава почна порано во однос на лани, јавува МИА.
“Жетвата на пченицата привршува и досега ожнеани се 85% од насеаните површини”, изјави Бранкица Димковиќ од подрачната единица на МЗШВ.
Димковиќ истакна дека приносите на јачменот и на пченицата кај семејните стопанства се послаби во однос на минатата година.
“Приносите се движат од 1.500 до 2.000 килограми и на двете култури, што се должи на лошите временски прилики. Кај претпријатијата приносите се поголеми во однос на индивидуалните земјоделци, но и таму се послаби во однос на лани”, истакна Димковиќ.
Годинава пченицата се сеела на површина од 12.820 хектари, од кои најголем дел сееле индивидуалните земјоделци на 10.820, а претпријатијата на површина од 2.000 хектари. Јачменот бил засеан на 8.713, од кои на 1.000 хектари сееле претпријатијата, а производителите на 7.713.
Земјоделците од трите општини целосно ја завршиле жетвата на рж на посеана површина од 347 хектари, како и на овесот кој годинава се сеел на површина од 901 хектар.
