Групацијата Lego за прв пат по 30 години стартуваше кампања за познатиот бренд, насловена како Rebuild the world. Целта на истата е да ја поттикне новата генерација да ги негува креативните вештини, односно “одново да го изгради светот“.
Глобалната кампања е креирана од страна на француската агенција BETC и се состои од акционен филм каде што во главна улога се зајак и ловец кој го брка со лак и стрела. Низ целата приказна се користат разни Lego креации со коишто се пребродуваат предизвиците.
Целата композиција е во знакот на дводимензионалните фигури, од облека и автомобили, до дрвја и животни. Дури и луѓето се “движат“ како Lego коцки.
Секој лик е базиран на постоечка фигура и секојдневните предмети се со огромни димензии, пишува Ad Age.
За стартување на кампањата, компанијата склучи партнерство со музичкиот продуцент Марк Ронсон, британскиот дизајнер Доминик Вилкокс и 19-годишниот Дејви Агулар кој изработи вештачка рака од Lego коцки.
Групацијата ќе одржи и серија на специјални јавни настани во повеќе светски градови, каде што деца и возрасни ќе можат да “помогнат во изградбата на еден нов поубав свет“.
Фото: Lego
