Можеби не сте свесни за некои ваши навики или мислите дека се безопасни, но доколку претерате со истите, ќе оставите впечаток дека сте непрофесионални во работата.
Ако се пронајдете во некоја од следниве, потрудете се веднаш да ја елиминирате.
Нетрпеливост
Една од навиките што прават да изгледате непрофесионално е токму нетрпеливоста. Дури и кога останатите се нервозни поради нешто, вие останете смирени. Ако често не можете да се стрпите за одредени работи, ќе оставите впечаток на незадоволна и нервозна личност.
Доцнење
Секој ќе забележи доколку постојано доцните. Дозволено е некогаш поради оправдани причини, но воопшто не е професионално ако тоа ви стане навика. Со тоа изгледате неодговорно и вашето работно место може за кратко да припадне на друг.
Жалби и поплаки
Секој за нешто е незадоволен и понекогаш сака да се пожали. Но, ако сте од оние на кои ништо не им се допаѓа и имаат забелешки за сè, не очекувајте дека ќе им се допаднете на колегите и дека шефот ќе го трпи тоа однесување.
Непримерен речник
Лошите зборови и пцовки не треба да се употребуваат никаде, особено не на работното место. Колку и да се лути за нешто, одбирајте ги зборовите внимателно. Не дозволувајте да навредувате други и да звучите некултурно пред никого.
Неуредност
Секој возрасен човек треба да се потруди да биде уреден, а тоа особено важи за работното место. Не смеете да оставате неред на бирото, во кујната каде што јадете или на било кое заедничко место со остатокот од тимот. Уредноста важи и лично за вас. Доаѓајте примерно облечени, со уреден изглед. Иако облеката не го чини човекот, во голема мера става белег на вашето професионално однесување.
Фото: Pixabay
