Смартфоните на Samsung Galaxy Z Fold 3 и Z Flip 3 за некои изгледаат како лоша инвестиција, делумно поради високата цена, но и фактот што тие не нудат целосно врвно искуство, освен ако, се разбира, можноста за преклопување се исклучи.
Но, Samsung во својот блог пост се пофали дека продажбата на телефони на преклопување никогаш не била подобра. Имено, компанијата тврди дека во 2021 година продале четири пати повеќе телефони на преклоп отколку во 2020 година, сето тоа благодарение, како што велат, на новите Z Fold и Z Flip.
„Кога Samsung Electronics го претстави својот прв прототип на флексибилен дисплеј во 2011 година, малку луѓе сфатија дека се сведоци на иднината на мобилната индустрија. Сега, една деценија подоцна, Samsung испорача четири пати повеќе уреди за преклопување отколку во 2020 година, надминувајќи го трикратниот раст на пазарот што го очекуваа аналитичарите“, велат од јужнокорејската компанија.
Бидејќи Samsung не го открива точниот број на продадени уреди, кои наводно сочинуваат околу 88 отсто од вкупните телефони на пазарот што се преклопуваат, „The Verge“ шпекулира дека во 2021 година тие продале околу 10 милиони. Компанијата очекува овие бројки да се зголемат за 10 пати до 2023 година, што се многу амбициозни, но сосема реални претпоставки.
„Со воспоставување на сосема нова категорија на мобилни уреди пред една деценија, Samsung ја подигна границата на мобилните иновации. Компанијата ќе продолжи со пронајдоци во мобилното искуство и во следната деценија“, заклучуваат од Samsung.
