Вкупната продажба на микрочипови во светот во изминатата 2021 година изнесуваше 583,5 милијарди долари и за прв пат во историјата ја надмина „границата“ од половина трилион долари. Пандемијата ја зголеми глобалната побарувачка за високотехнолошки уреди, објави „Известија“.
Како резултат на тоа, глобалната индустрија за полупроводници ги зголеми своите приходи за една четвртина минатата година.
Во исто време, недостигот на микропроцесори во светот продолжува. На производителите на компјутери, паметни телефони, автомобили итн. им требаат чипови. Затоа компаниите, светски лидери во индустријата за полупроводници, планираат да инвестираат стотици милијарди долари во капитал во наредните години.
Годинава, имајќи го предвид континуираниот дефицит, експертите очекуваат зголемување на продажбата на микрочипови во светот за уште 9%. И до крајот на оваа деценија (2030) се очекува вкупниот годишен приход на индустријата за микрочипови ширум светот да достигне 1 трилион долари, предвидуваат експертите.
