Цените на пченицата пораснаа на светските пазари откако Русија соопшти дека ќе ги третира бродовите кои пловат кон украинските пристаништа како потенцијални воени цели.
Москва оваа недела се повлече од договорот со кој се гарантира безбеден премин за испораките на жито низ Црното Море.
Портпаролот на Белата куќа ја обвини Русија дека планира да ја обвини Украина за напади врз цивилни бродови. Рускиот претседател Владимир Путин рече дека веднаш ќе се врати на договорот за жито доколку се исполнат неговите барања. Тие вклучуваат повторно поврзување на Руската земјоделска банка со глобалниот платен систем.
Цените на пченицата на европската берза поскапеа за 8,2 отсто, на 253,75 евра за тон, додека пченката поскапе за 5,4 отсто.
Фјучерсите на американската пченица скокнаа за 8,5 отсто во средата, што е нивна најголема дневна добивка од руската инвазија на Украина. Украинскиот министер за земјоделство, Микола Солски, рече дека нападите уништиле 60.000 тони жито и оштетиле значителни делови од инфраструктурата за извоз на жито.