Македонска берза и Капитал Финансиски Центар организираа заеднички настан за подигнување на финансиската писменост на жените. На вчерашната панел дискусија насловена како „Жените и парите – емоција или разум“, преку лични искуства, оваа тема беше разгледана од различни перспективи за да се утврди кога повеќе преовладуваат емоциите, односно разумот при носење финансиски одлуки.
На панел дискусијата учествуваа Билјана Станковска Арсова од Капитал Финансиски Центар, друштво за финансиско советување и едукација во областа на личните финансии, Билјана Атанасовска од психолошкото советувалиште „Божилак“ како дипломиран психолог и Каролина Каровска Божиноска од Македонската берза, раководител на оддел за Едукација, промоција и развој на Берзата.
„Во дискусијата ја истакнавме потребата секоја жена активно да управува со личните финансии за да си обезбеди што поголема финансиска стабилност. Развојот на нови финансиски инструменти наметнува потреба за промена на навиките и стереотипите. Споделувајќи ги личните искуства сакаме да ги мотивираме сите жени да се едуцираат во областа на управување со личните финансии и да научат да преземаат поголем ризик за да остварат поголем профит. Разговаравме за емоциите и разумот зад финансиските одлуки и за предизвиците и успесите кои ги искусуваат жените во управување со сопствените финансии“, рече Станковска Арсова од Капитал Финансиски Центар како иницијатор на панел дискусијата.
Во различен период од животот жените имаат различни потреби и желби, од кои произлегуваат и нивните цели. „За да ги оствариме своите цели, честопати потребни се финансиски средства. А за да имаме финансиски средства треба да знаеме како да управуваме со сопствените финансии. А за да знаеме КАКО, неопходно е информирање, едукација и професионално советување. Во донесување одлуки понекогаш движечка сила е љубовта, желбата за поквалитетен живот и благосостојба, а понекогаш стравот или загриженоста“, рече психологот Атанасовска.
Според неа, жените од различни возрасти и од различни професии, се согласни дека иако најчесто емоцијата е тригерот, таа оди “рака под рака” со разумот, особено за крупни и важни животни одлуки каква што е и постигнување лична и/или семејна финансиска благосостојба. Истражувањата покажуваат дека жените кои работат со финансиски експерти се чувствуваат двојно повеќе финансиски сигурни и имаат значително подобрување во финансиската состојба.
Каровска Божиноска од Македонската берза истакна дека финансиската писменост игра голема улога за постигнување на финансиската слобода. „Критичното разбирање на финансиските концепти, инструменти и стратегии овозможува жената да донесува интелигентни и информирани одлуки за своите финансии. Финансиската слобода е состојба на разум, емоции и одлуки кои ја овозможуваат личната благостојба и независност“, заврши Каровска Божиноска.
Секоја од свој аспект го сподели своето лично искуство со вложувањата, а на крајот сите констатираа дека исправно е жените похрабро да влезат во светот на акциите, зошто таквите вложувања се долгорочно многукратно поисплатливи од кои било друг финансиски инструмент на пазарот.
