Италијански министер истакна дека користењето на името Milano е нелегално бидејќи кросоверот ќе се склопува во Полска
Alfa Romeo Milano ја доживеа својата премиера пред помалку од една недела, но веќе претрпе голема промена. Всушност, моделот повеќе нема да се нарекува Milano.
Изненадувачкиот развој доаѓа набргу откако Адолфо Урсо, италијанскиот министер за претприемништво и италијанско производство, сугерираше дека името е нелегално бидејќи автомобилот ќе се произведува во фабриката на Stellantis во полскиот град Тичи. Како што објасни тој, „автомобил наречен Milano не може да се произведува во Полска“, бидејќи законот „пропишува дека не можете да давате индикации што ги доведуваат потрошувачите во заблуда“. Всушност, тој тврдеше дека купувачите ќе бидат измамени да мислат дека кросоверот е направен во Милано.
Иако тоа изгледа како смешен аргумент се чини дека сето ова беше премногу за Alfa Romeo. Како резултат на тоа, тие одлучија да го преименуваат Milano во Junior.
Тоа е неверојатна промена, особено ако се земе предвид дека италијанската влада имаше месеци да протестира поради името, но компанијата одлучи дека тоа е најдобриот потег. Како што објаснија тие, „И покрај … верувањето дека името ги исполнува сите законски услови и дека има прашања многу поважни од името на новиот автомобил, Alfa Romeo одлучи да го промени од „Milano“ во „Alfa Romeo Junior“ во дух на унапредување на меѓусебното разбирање“. Alfa Romeo на шега се заблагодари на владата за „бесплатниот публицитет предизвикан од оваа дебата“.
Извршниот директор на Alfa Romeo, Жан-Филип Импарато рече: „Изборот на името Alfa Romeo Junior е сосема природен, бидејќи е силно поврзан со историјата на брендот и е меѓу нашите омилени и меѓу омилените на јавноста од самиот почеток“. Тој додаде: „Решивме да го смениме името, иако знаеме дека тоа од нас не се бара, затоа што сакаме да ја зачуваме позитивната емоција што отсекогаш ја создавале нашите производи и да избегнеме секаков вид контроверзии“.
Извршниот директор продолжи да рече дека кросоверот веќе е огромен успех бидејќи вниманието што го добија е „прилично возбудливо“. Конкретно, Импарато рече дека добиле „невиден број посети на онлајн конфигураторот, поради што веб-страницата се урна неколку часа“.
Да се вратиме на името, Alfa Romeo го претстави GT 1300 Junior во 1966 година како прифатлив модел наменет за младите потрошувачи. Тоа беше инстант успех и компанијата продаде повеќе од 92.000 единици.
Преземено од Avtoplus.mk
