На глобалните пазари, цените на нафтата се зголемија минатата недела, бидејќи залихите на црното злато во САД нагло паднаа, што укажува на посилна побарувачка на почетокот на летната сезона на патувања.
На лондонскиот пазар цената на барелот минатата недела порасна за 1,8 отсто, на 86,54 долари, додека на американскиот пазар цената на барелот порасна за 2,1 отсто, на 83,16 долари.
Во фокусот на трговците минатата недела беа податоците за побарувачката на почетокот на летната сезона на патувања во САД.
„Залихите се намалени за неверојатни 12 милиони барели“
Министерството за енергетика соопшти дека залихите на сурова нафта во претходната недела паднале за 12,2 милиони барели, значително повеќе од очекуваното, а намалени се и залихите на бензин за 2,2 милиони барели.
„Залихите паднаа за неверојатни 12 милиони барели поради силниот извоз, намалениот увоз и зголемената рафинериска преработка“, објаснува Мет Смит од Кплер.
Од друга страна, се верува дека наскоро ќе започнат преговорите на Блискиот Исток меѓу Израел и палестинскиот Хамас, што значи дека ризикот од нарушување на производството на нафта во тој дел од светот се намалува.
