Комерцијална банка АД Скопје известува за следната ценовно чувствителна информација, известувањето го пренесуваме во целост:
Во врска со Понудата за преземање која се однесува на сите акционери кои поседуваат обични акции издадени од Стопанска банка АД Битола со седиште на ул. Добривое Радосављевиќ бр. 21, 7000 Битола, РС Македонија, Комерцијална банка АД Скопје, со седиште на ул. Васил Иљоски бр. 3, 1000 Скопје, РС Македонија, со ЕМБС 4065573 (во понатамошниот текст „Преземачот“), согласно член 47 од Законот за преземање на акционерски друштва (Службен весник на РСМ бр.69/2013, 188/2013, 166/2014, 154/2015, 23/2016, 248/2018 и 31/2020), го објавува следното:
ИЗВЕСТУВАЊЕ ЗА ИСХОДОТ НА ПОНУДАТА ЗА ПРЕЗЕМАЊЕ
објавена во дневниот весник „Слободен печат“ на 26.08.2024 година и
во Службен весник на РС Македонија бр. 177 од 26.08.2024 година
- Понудата за преземање беше прифатена од 149 (сто четириесет и девет) сопственици на обични акции со право на глас, кои поседуваат вкупно 176.154 обични акции, односно 45,0548% од сите акции со право на глас издадени од Стопанска банка АД Битола.
- Понудата за преземање се однесуваше на сите 390.977 обични акции со право на глас издадени од Стопанска банка АД Битола со ИСИН број: MKSBTB101013.
- Во Понудата за преземање, прагот на успешност, односно најмалата количина обични акции која требаше да биде прифатена за да се смета за успешна понудата за преземање беше определена на 261.956 обични акции со право на глас, што претставува 67 % плус 1 акција од вкупниот број обични акции со право на глас издадени од Стопанска банка АД Битола.
Со оглед на тоа што прагот на успешност не е постигнат, понудата за преземање на Стопанска банка АД Битола од страна на Комерцијална банка АД Скопје се смета за неуспешна. Причина за неуспешност е тоа што не се изјаснија позитивно по однос на понудата на Банката доволен број акционери кои поседуваат обични акции со право на глас, односно во законски утврдениот рок до 22.09.2024 година не дадоа Изјава за прифаќање на понуда за откуп по цена од 3.200 денари по акција.
Комерцијална банка АД Скопје на акционерите на Стопанска банка АД Битола им посакува успех во понатамошното работење.
