На Волстрит, индексот S&P 500 падна од рекордно високо ниво во четвртокот, бидејќи неизвесноста околу тарифите и слабиот извештај за заработката на Walmart ги направи инвеститорите претпазливи.
Dow Jones падна за 1,01 отсто на 44.176 поени, додека S&P 500 се лизна за 0,43 отсто на 6.117 поени, а индексот Nasdaq падна за 0,47 отсто на 19.962 поени.
Меѓу најголемите губитници беше Walmart, чија цена потона за 6,5 отсто откако најголемиот светски трговски синџир објави дека очекува раст на продажбата во својата фискална година да биде помеѓу 3 и 4 отсто.
Ова е помал раст отколку што проценуваа аналитичарите и сугерира дека може да се очекува слабеење на побарувачката на потрошувачите.
Како резултат на тоа, цените на акциите на другите трговски синџири, како Таргет и Костко, исто така паднаа за околу 2 отсто.
“Со оглед на тоа што потрошувачката сочинува 70 отсто од американската економија, слабите насоки на Walmart доведе до нервоза за силата на потрошувачите и нивното идно трошење. Ова изврши притисок врз акциите на Walmart, кои потоа се проширија на целиот пазар”, објаснува Роберт Павлик, аналитичар во Dakota Wealth.
Резултатите на Walmart, исто така, им дадоа на инвеститорите увид за тоа како компанијата очекува да се справи со растечката листа на производи на кои американскиот претседател Доналд Трамп сака да воведе царини.
Во средата, таа листа беше проширена за да вклучи граѓа, автомобили, полупроводници и фармацевтски производи.
„Не можете да зборувате за неизвесност без да ги спомнете тарифите, нели? Насловите за тоа се многу измешани. Дали Трамп ги користи најавите за тарифи како алатка за преговори? Дали е сериозен во врска со тоа? Кој ќе биде засегнат, вели Мајк Диксон, аналитичар во Horizon Investments.
Најновите макроекономски показатели, вклучувајќи ги барањата за невработени и фабричките активности, укажуваат на тоа дека американската економија останува во добра состојба.
Но, некои економисти предупредуваат дека се можни пореметувања на пазарот на трудот како резултат на илјадници федерални вработени неодамна отпуштени од Одделот за владина ефикасност (DOGE), предводен од милијардерот Илон Маск.
