Американскиот претседател Доналд Трамп изјави дека веројатно ќе воведе царини за фармацевтски производи на крајот од месецот, а царините за полупроводници исто така би можеле наскоро да стапат во сила. Овие мерки, рече тој, би можеле да се воведат паралелно со пошироки „реципрочни“ царини што треба да стапат во сила на 1 август.
„Веројатно на крајот од месецот, а ние ќе започнеме со ниска царина, за да им дадеме на фармацевтските компании една година да градат фабрики во САД, а потоа ќе воведеме многу висока царина“, изјави Трамп пред новинарите во Вашингтон во вторник, според Блумберг.
Тој, исто така, објави планови за воведување царини од повеќе од 10 проценти за стоки од помали земји, вклучувајќи ги земјите од Африка и Карибите. „Веројатно ќе воведеме единствена царина за сите нив“, рече Трамп, додавајќи дека таа би можела да биде малку повеќе од 10 проценти и би се однесувала на стоки од најмалку 100 земји.
Американскиот министер за трговија, Хауард Лутник, додаде дека овие царини ќе се применуваат главно за африканските и карипските земји, кои генерално имаат скромен обем на трговија со САД и нема значително да влијаат на целта на Трамп за намалување на трговските дефицити со главните партнери.
Порано овој месец, Трамп испрати писма до адресите на дваесетина земји и Европската Унија, информирајќи ги за новите царини што ќе стапат на сила на 1 август. Овие царини беа во голема мера на ниво на таканаречените „априлски“ стапки од 2 април, што предизвика паника на финансиските пазари и го наведе Трамп да постави рок од 90 дена за преговори, кој истече на 9 јули.