За прв пат во историјата на Henley Passport Index, листата на најмоќни пасоши во светот не ги вклучува Соединетите Американски Држави во првите десет. САД паднаа на 12-то место заедно со Малезија во најновиот квартален извештај. Македонија го зазема 36-то место на листата, со безвизен пристап до 129 земји.
Од земјите во регионот, најдобро пласирани се Грција, Словенија и Хрватска, кои се меѓу првите десет. Србија е на 36-то место, Црна Гора е на 43-то место, а Босна и Херцеговина е подолу од нас и ја зазема 47-мата позиција.
Што го прави пасошот „моќен“?
Еден јасен показател е отвореноста на патувањето, можноста за влегување во дестинации низ целиот свет едноставно со покажување пасош, без потреба од виза.
Индексот „Henley Passport“ е еден од неколкуте индекси што ја мерат таквата „моќ“ на пасошот и, во својата 20-годишна историја, го означува првиот пат кога американски документ ги напушта првите десет.
Три азиски пасоши сега го држат првото место: Сингапур со пристап без виза до 193 дестинации, Јужна Кореја со пристап до 190 дестинации и Јапонија со 189 дестинации. Хрватска влезе во првите 10 и е исто така пред САД, на осмото место.
САД сега се рангираат на 12-то место, заедно со Малезија. Нивните граѓани не требаат визи за 180 од 227 земји и територии што ги следи индексот.
Индексот, составен од лондонската консултантска фирма Хенли и партнерс, користи ексклузивни податоци од Меѓународното здружение за воздушен транспорт (IATA). Бидејќи „Хенли“ брои повеќе земји со ист резултат како едно место, всушност 36 земји имаат подобар резултат од САД на таа листа.