Превртувањето на амбициите за електрични возила (EV) ја чинеше глобалната автомобилска индустрија најмалку 65 милијарди долари загуби во текот на изминатата година, а раководителите предупредуваат дека би можеле да следат уште повеќе проблеми со прилагодувањето на стратегиите.
Производителите на автомобили беа принудени да ги преиспитаат своите планови за развој и инвестиции на електрични возила по радикалниот пресврт во политиката за климата во Соединетите Американски Држави. Најтешко погодени се компаниите што постигнаа најголем напредок во префрлањето од бензински мотори, пишува „Фајненшл тајмс“.
Овој месец „Стелантис“ регистрираше трошок од 26 милијарди долари за отпишување на некои целосно електрични модели и рестартирање на популарниот 5,7-литарски V8 мотор „Хеми“ во САД. Компанијата неодамна одлучи повторно да воведе дизел мотори во неколку европски модели. Овој отпис предизвика пад на цената на акциите, намалувајќи ја пазарната вредност на компанијата за околу шест милијарди долари.
Сопственикот на брендовите „Пежо“, „Фиат“ и „Џип“ претходно планираше електричните возила да учествуваат во целата продажба на патнички возила во Европа и во половина од вкупната продажба во САД до 2030 година.
Крајот на даночните олеснувања за електричните возила во САД и решеноста на претседателот Доналд Трамп дополнително да ги олабави регулативите за намалување на емисиите значат дека раководителите на индустријата сега очекуваат електричните возила да сочинуваат само околу пет проценти од пазарот на нови возила во САД во наредните години, што е приближно половина од сегашните нивоа.
Конкурентската компанија „Форд мотор“ неодамна објави отпис од 19,5 милијарди долари по откажувањето на електричната верзија на пикапот „Ф-150“, додека „Фолксваген“, „Волво карс“ и „Полстар“ исто така претрпеа загуби во своите програми за електрични возила во текот на изминатата година.
Покрај големите регулаторни промени во САД, аналитичарот на „Бернштајн“, Стивен Рајтман, верува дека „Стелантис“ и другите производители го изгубиле контактот со потрошувачите додека се обидуваат да го повторат раниот успех на „Тесла“, кој го револуционизираше американскиот пазар на електрични возила. Нивниот проблем беше што не нудеа возила што ги исполнуваа очекувањата на клиентите во однос на цената и дометот, додека инфраструктурата за полнење беше недоволно развиена.
Во меѓувреме, „Тесла“ исто така забележа значителен пад на продажбата на електрични возила поради конкуренцијата од кинеските производители и реакциите на политичката вмешаност на Елон Маск, а го прекина и производството на своите најскапи модели „С“ и „Х“.
Аналитичарите предупредуваат дека би можеле да следат дополнителни отписи за „Стелантис“, бидејќи компанијата се обидува да го зголеми пазарниот удел во САД со пренасочување на хибридни и бензински модели.
Хонда, единствениот јапонски производител кој објави целосен прекин на производството на бензински и дизел возила до 2040 година, оваа недела прогнозираше годишни загуби од 4,5 милијарди долари поврзани со електричните модели, вклучувајќи 1,9 милијарди долари отписи. Компанијата предупреди дека се можни дополнителни трошоци бидејќи ја преиспитува својата стратегија за електрични возила и го прекинува своето партнерство за електрични возила во САД со Џенерал Моторс, кој самиот отпиша 7,6 милијарди долари од својот бизнис за електрични возила.
Извршната директорка на Џенерал Моторс, Мери Бара, рече дека крајната цел на компанијата останува целосна електрификација, што го потврдуваат и другите производители кои продолжуваат да планираат долгорочни инвестиции во транзиција од моторите со внатрешно согорување.
Како што темпото на електричната транзиција сè повеќе се разликува помеѓу клучните пазари како САД и Кина, ќе стане уште поскапо за производителите паралелно да нудат различни видови возила, од електрични и хибридни до бензински.
Извршниот директор на Форд, Џим Фарли, рече дека глобалната регулаторна средина е „непозната“ бидејќи компанијата ја прилагодува својата стратегија и инвестиции. Сепак, тој додаде дека постојат доволно различни трендови во електрификацијата низ целиот свет за компанијата да може да ја прилагоди својата понуда на пазарите и да најде соодветна стратегија, не само во САД, туку и глобално.