Германскиот железнички превозник DB Cargo планира да отпушти 6.200 работни места како дел од сеопфатно реструктуирање на бизнисот и излез од „црвеното“, изјави извршниот директор Бернхард Озбург. DB Cargo ќе отпушти 6.200 од своите приближно 14.000 работни места со полно работно време во Германија, во речиси сите оддели, вклучувајќи транспорт, планирање, администрација, продажба и ИТ, според Озбург.
ЕК ја одобри помошта, но под услов
Кратењата на работни места се дел од поширок план за реструктуирање на подружница на германската државна железничка група Deutsche Bahn. Европската комисија ја одобри помошта на германската држава за DB Cargo под услов до крајот на 2026 година да ги постави темелите за долгорочно самоодржливо работење.
Во првата половина од минатата година, компанијата работеше со оперативна загуба од 96 милиони евра. Претходникот на Озбург на челната позиција во DB Cargo, Зигрид Никута, исто така се обиде да го реструктуира бизнисот, но се повлече откако независните ревизори негативно ја оценија нејзината план за закрепнување.
Четири столба на новата стратегија
Озбург сега презентираше среднорочна стратегија која се потпира на четири столба и треба да се спроведе до 2030 година. Независната ревизорска проценка треба да биде до крајот на месецот, а вработените и надзорниот одбор беа известени оваа недела.
Со оглед на слабеењето на побарувачката од клучните германски клиенти во автомобилскиот, хемискиот и челичниот сектор, DB Cargo планира да го префрли својот фокус на други европски пазари.
Компанијата, исто така, се стреми да ги намали трошоците за околу 1 милијарда евра до 2030 година, вклучувајќи намалување на 4.000 работни места, поедноставување на административните процеси и зголемување на ефикасноста на возниот парк.
Дополнителни 2.000 работни места ќе бидат укинати во товарниот транспорт со „скратени“ состави, кои ќе бидат реорганизирани. Дури и со новата структура, тој дел од бизнисот ќе работи со загуба и ќе зависи од федералната поддршка, истакна Озбург.