Србија успешно ги затвори сите отворени прашања со унгарскиот МОЛ и постигна компромис за акционерскиот договор за Нафтената индустрија на Србија (НИС), кој треба да биде одобрен од американската администрација, објави во среда вечерта српската министерка за рударство и енергетика Дубравка Ѓедовиќ Хандановиќ.
Компромисот е постигнат пет дена пред рокот што го постави американската администрација за договорот меѓу унгарскиот МОЛ и рускиот Гаспромнефт за купопродажба на мнозински удел во Нафтената индустрија на Србија (НИС), како дел од рускиот енергетски сектор кој е под санкции на САД од почетокот на 2025 година.
Доколку МОЛ и Гаспромнефт се договорат за продажба на 56,15 проценти од рускиот удел во НИС до 16 јуни, а таа аквизиција биде одобрена од Канцеларијата за контрола на странски средства (OFAC) при Министерството за финансии на САД, договорено е Србија да го зголеми својот сегашен удел за пет проценти и трајно да го обезбеди работењето на рафинеријата.
Српската влада поседува 29,9 проценти од НИС, а остатокот им припаѓа на малите акционери и вработените. Министерката Ѓедовиќ Хандановиќ на својот Инстаграм изјави дека договорот со МОЛ обезбедува „дополнителни права во однос на донесувањето или блокирањето на важни одлуки“ за Србија.
Унгарската компанија вети дека рафинеријата НИС во Панчево ќе продолжи да работи како што работела досега, „со барем ист просечен годишен капацитет како во последните четири години пред воведувањето на американските санкции, кога НИС работеше одлично“, изјави Ѓедовиќ Хандановиќ. Според нејзиното објаснување, ваков вид работа на Рафинеријата е неопходна за да се задоволи српскиот пазар на нафтени деривати, што „беше едно од клучните прашања за српската страна“.
Компромисот со MOL, исто така, предвидува дека српските членови на Одборот на директори на НИС ќе имаат „генерално поголеми овластувања од порано во донесувањето, но и блокирањето на потенцијално неповолни одлуки за Србија“. Србија немала такво влијание од 2008 година, кога НИС беше приватизиран, додаде таа.
Министерката најави дека ќе се работи дополнително „за наоѓање долгорочно решение за НИС“, бидејќи „воведувањето американски санкции не е вина на државата Србија, ниту на нејзината влада, ниту на нејзините граѓани“.