Зелен плик од приватните пензиски фондови до членовите

Пензиските друштва во земјата еднаш годишно во писмена форма ќе доставуваат до своите членови извештаи за состојбата на средствата на нивните сметки. Извештаите, со состојбата на пензиската заштеда на членот и со портфолиото на пензискиот фонд, ќе се доставуваат во зелен плик за нивна полесна препознатливост.
Со ова, како што информира претседателот на Советот на експерти на МАПАС Булент Дервиши, е воведена најновата измена на подзаконската регулатива.
Дервиши додаде дека се направени одредени измени и во форматот и содржината на овие извештаи во насока на нивна поголема прегледност, поедноставен и сликовит приказ на пензиската заштеда на членовите и инвестирањето на нивните средства, како и вклучување на појаснување на основните термински поими кои се уште се непознати за членовите.
“Сите овие измени МАПАС ги направи слушајќи ги желбите и потребите на членовите. Пред околу една година беше спроведено истражување, во кое со директни интервјуа и фокус групи составени од членови се зборуваше за овие извештаи, колку ги разбираат и што не разбираат. МАПАС постојано се залага за транспарентен пристап, а едновремено врши и едукативна улога, така што на некој начин и ги учиме членовите за нивните права и обврски од вториот и третиот столб”, истакна на прес-конфернцијата Дервиши.
Во вториот има над 350.000 членови и околу 20.000 во тетиот и околу 440 милиони евра за кои се грижи МАПАС. Дервиши посочи дека бројот на членови и средства континуирно расте.
“Во насока на подигнување на свеста на јавноста за капитално финансираното пензиско осигурување и излегување во пресрет на интересите на своите членови МАПАС, веќе во текот на целата претходна година активно презема активности за подигнување на свеста на јавноста и особено младите како идни членови во тростолбниот пензиски систем преку едукативна кампања за младите и посети на средните училишта и факултети, делење информативни флаери, активирање и редовно ажурирање на новости на фејсбук страна, изработка и достава на електронски информатор Е-МАПАС”, додаде Дервиши.
Тој апелираше до членовите на вториот и третиот столб да ги ажурираат своите лични податоци за да може зелениот плик да стигне до нив.
“За членот да знае колкава е неговата пензиска заштеда и како се инвестирани неговите пари, пожелно е секој член на пензиските фондови кој нема да добие зелен плик од своите пензиски друштва да се јави во пензиските друштва или МАПАС за проверка дали нивните податоци се точни и целосни”, потенцираше претседателот на МАПАС.
Дервиши додаде дека МАПАС постојано е насочена кон заштита на интересите на членовите и, како и досега, ќе продолжи секојдневно со своите супервизорски активности врз пензиските друштва и пензиските фондови и ќе работи на промоција и на развивање на свеста кај јавноста за целите и принципите на капитално финансираното пензиско осигурување и негово континуирано поттикнување и унапредување.