Германската компанија Техникал текстил ќе инвестира во Македонија, со што, во првата фаза, ќе се отворат од 500 до 600 нови работни места.
Компанијата се занимава со производство на изолациони материјали за градежната, автомобилската и авионската индустрија.
Како што беше најавено, во првата фаза планирано е да бидат инвестирани 12 милиони евра, а фабриката во Македонија ќе биде лоцирана во технолошко – индустриската развојна зона во Штип.
Планираниот извоз во првата година ќе биде меѓу 20 и 30 милиони евра, но за две до три години се очекува негово зголемување.
“Ова е одлично место за нас. Давачките се ниски, има поволни услови за водење бизнис и квалификувана работна сила. Земјата е убава и луѓето се многу пријатни“, изјави сопственикот Џенс Вандланд по средбата со премиерот Никола Груевски.
Македонија е избрана во конкуренција со голема слободна економска зона во Абу Даби.
“Компанијата ги разгледувала можностите за инвестирање во Абу Даби, но целиот процес на пример на издавање на градежна дозвола траел повеќе од две години. Случајно при патување, сопственикот на компанијата во економски магазин во Германија видел напис каде Македонија е споредена со други земји од гледна точка на даноците. Неколку дена подоцна дојде во Македонија и многу брзо му беа дадени сите потребни информации за инвестирање“, рече директорот на Дирекцијата на технолошко – индустриските развојни зони, Виктор Мизо.
Фабриката во Македонија ќе биде петта по ред по веќе постоечките во Германија, Словачка и Кина.
