Компанијата Арцелор Митал ја претстави својата најнова инвестиција, вредна 3,5 милиони евра. Станува збор за печка за поцинкување на лимени плочи, според најсовремена технологија. Таа ги задоволува сите еколошки стандарди и овозможува драстично намалување на штетните емисии во воздухот, а освен тоа, овозможува компанијата да ја зголеми својата услуга, капацитет и квалитет на производството.
„Инвестиравме во најсовремена технологија со цел компанијата да обезбеди навремено доставување на квалитетни производи според потребите на нашите потрошувачи и според најсложените здравствени, безбедносни и еколошки прописи“, изјави Хуан Педро Химинез Наваро, извршниот директор на Арцелор Митал, на вчерашната презентација на оваа инвестиција.
Тој потсети дека Арцелор Митал – Скопје спаѓа во редот на 10 најголеми компании во Македонија, има над 550 вработени и преку 400 дилери остварува профит од 32 милиони евра годишно.
Според Бруно Рибо, регионалниот директор на Арцелор Митал, европската криза има негативен одраз и за челичната индустрија, а со тоа и врз работењето на компанијата. Тој рече дека поради големиот раст на цените на енергенсите и до 50%, од почетокот на годинава до сега трошоците во компанијата се зголемени за 15%.
Арцелор Митал е водечка компанија за производство на челик во светот и присутна е во повеќе од 60 земји. Во 2011 година имаше приход од 94 милијарди долари, произведе 54 милиони тони железна руда и 8 тони металуршки јаглен.
