Банката на Јапонија е подготвена да ја зголеми својата референтна каматна стапка од еден на 1,25 проценти во петок, што би било највисоко ниво во последните 31 година. Со тоа, Јапонија би направила уште еден чекор во напуштањето на политиката на речиси бескаматно задолжување што ја карактеризира нејзината економија со децении и го направи јенот една од главните валути за евтино финансирање низ целиот свет.
Зголемувањето би се случило само три месеци по претходното, а исто така би ја ставило Јапонија заедно со другите големи централни банки кои повторно ја заоструваат монетарната политика поради постојаните инфлаторни притисоци, кои сега дополнително ги поттикнуваат високите цени на нафтата.
Пазарите веќе очекуваат само зголемување на каматните стапки, па затоа вниманието ќе биде насочено кон тоа што ќе каже гувернерот Казуо Уеда за следните потези. Инвеститорите се обидуваат да проценат дали Банката на Јапонија има намера да продолжи да ги зголемува каматните стапки и колку брзо. Доколку Уеда заземе поблаг став, јенот би можел повторно да ослабне, што дополнително би ги зголемило трошоците за увоз, особено за енергија. Доколку, од друга страна, тој најави поагресивно зголемување на каматните стапки, тоа би можело да предизвика дополнителни превирања на пазарот на јапонски државни обврзници, каде што приносите веќе ги достигнаа највисоките нивоа во последните три децении, објавува Ројтерс.
Банката на Јапонија ја напушти децениската политика на монетарни стимулации во 2024 година и неколку пати оттогаш ги зголеми каматните стапки. Сега инфлацијата е повторно во центарот на вниманието. Покрај поскапата нафта, растот на цените е под влијание на послабиот јен, што го прави увозот поскап, како и силната побарувачка поврзана со развојот на вештачката интелигенција. Уеда процени дека основната инфлација е веќе доста блиску до целта од два проценти, поради што централната банка мора да внимава посебно да спречи забрзување на растот на цените.