Коалиција од девет земји, вклучувајќи ги Франција и Шпанија, води кампања на конференцијата на ОН за климатските промени (COP30) во Бразил за воведување дополнителен данок на авионските билети во бизнис класата и летовите со приватен авион.
„Оние што загадуваат повеќе треба да придонесат повеќе“, рече шпанската амбасадорка во Бразил, Марија дел Мар Фернандез-Паласиос, во изјава објавена во саботата од Коалицијата за солидарност на премиум летачи.
Во борбата против климатската криза, земјите треба да обезбедат предвидливи приходи што нема премногу да ги оптоваруваат обичните луѓе, рече таа.
Францускиот амбасадор за клима, Беноа Фарасо, рече дека даноците на солидарност, како даноците на луксузни летови, се во духот на Парискиот договор за климата, кој има за цел да го ублажи глобалното затоплување.
Сите земји на конференцијата за климата се поканети да се приклучат на иницијативата.
Портпаролот на германскиот министер за животна средина, Карстен Шнајдер, изјави за „Дер Шпигел“ дека новиот данок веројатно нема да биде дополнителен товар за луѓето што летаат со вакви летови.
„Секој што патува во прва класа или со приватен авион ќе може да го плати тој данок без никакви проблеми“, рече тој.
Сепак, германската влада оваа недела одлучи да го намали данокот на авионските билети од јули следната година, што предизвика големи критики од климатските активисти.
Летањето со авион е убедливо најлошата форма на патување кога станува збор за влијанието врз климата.
Според Коалицијата за солидарност на премиум летачи, само еден процент од светската популација е одговорна за повеќе од половина од емисиите на стакленички гасови што ги испушта комерцијалната авијација.