Германските компании планираат малку помалку отпуштања од претходно, но закрепнувањето на економијата сè уште не е доволно силно за да поттикне повеќе вработување, според извештајот објавен денес од Минхенскиот економски институт Ифо за октомври.
Вредноста на индексот, кој ја мери подготвеноста на германските фирми за вработување, се зголеми од септемвриските 95,1 поени на 95,5 поени, што укажува на мало подобрување на очекувањата, според извештајот.
Во преработувачката индустрија, ситуацијата малку се влоши во споредба со септември, а компаниите сè уште најмногу планираат да го намалат бројот на вработени, особено во автомобилската индустрија.
Спротивно на тоа, производителите на опрема за обработка на податоци, електронски и оптички производи планираат нови вработувања.
Услужниот сектор покажува поголема подготвеност за вработување, додека оптимизмот се зголемува и кај агенциите за привремено вработување, благодарение на подобрените економски перспективи.
Во трговијата, компаниите сè уште планираат да го намалат бројот на работници, а се очекува и мал пад на вработеноста во градежништвото, според Ифо на својата веб-страница.