Хидроелектричната централа Шпилје во првите пет месеци од оваа година произведе 69 милиони киловат часови електрична енергија.
“Ако до крај на март поради сушната зима имавме релативно низок водостој и акумулацијата беше исполнета под 50%, дождовите во април и мај поволно влијаеја врз зголемување на дотеците и значително ја подобрија хидролошката состојба. Имаме одличен водостој за овој период од годината што гарантира стабилно производство во текот на летниот и есенскиот период“, велат од ХЕЦ Шпилје.
Моментно акумулацијата Дебарско Езеро е исполнета околу 91% и има резерва на вода за производство на над 36 милиони киловат часови електрична енергија. Нивото на акумулацијата изнесува 570 метри или уште два метра до максималната кота, но присутен е тренд на опаѓање на водостојот поради намалување на дотеците.
Електраната е во солидна состојба и произведува во согласност со потребите на електро – енергетскиот систем на Република Македонија. Солидната резерва гарантира уште една добра производна година во овој значаен електро – енергетски објект, каде годишниот план предвидува производство на 282 милиони киловат часови електрична енергија.
