Концесионерите на минералните суровини побараа да се зајакнат контролите во нивниот сектор. Најгорливиот проблем за концесионерите, кои работат строго почитувајќи го законот и навремено ги подмируваат обврските кон државата во вид на концесиски надоместоци, од кои 78% одат во буџетот на општината каде се наоѓа локалитетот, а 22% се слева во државната каса, е нелојалната конкуренција.
Министерот Сараќини, излегувајќи во пресрет на барањата на концесионерите, најави засилени контроли во овој сектор, во кои покрај инспектори од Државниот инспекторат за техничка инспекција ќе земат учество и останатите инспекциски служби во државата, вклучувајќи ја и трудовата инспекција и УЈП.
Концесионери на минерални суровини го информираа министерот за тековните активности на локалитетите за кои ја имаат добиено концесијата, за предизвиците со кои се соочуваат при работењето, а воедно сакаа да се информираат и за електронското аплицирање за концесии, што претставува една од новините кои ги воведе Министерството за економија, во насока на олеснување на постапката.
