Најдобрите пет ИКТ студенти заминуваат на студиска посета во Кина

3

Министерот за информатичко општество и администрација Дамјан Манчевски, главниот извршен директор на Хуавеи во Македонија Марин Тинчев и амбасадорката на Народна Република Кина во Македонија Jин Лисјен присуствуваа на свеченото доделување ваучери на петте најдобри студенти во областа на информатички технологии и телекомуникации.

Во  рамки на програмата Huawei Seeds for the Future, која постои од 2008 година а во Македонија се одржува по трети пат, студентите ќе престојуваат во Кина на двонеделна студиска посета, каде ќе имаат можност да ги надградат своите знаења.

Посакувајќи им успешен престој во Кина, министерот Манчевски истакна дека ова ќе биде позитивно искуство за студентите бидејќи тие ќе имаат можност да видат во пракса се што научиле за време на студиите. ИКТ струките во Македонија произведуваат квалитетни кадри, кои понатаму имаат можност да добијат вработување насекаде во светот.

Обраќање имаше и амбасадорката на Народна Република Кина во Македонија Jин Лисјен која изрази надеж дека посетата на студентите ќе биде успешна и продуктивна, во исто време заблагодарувајќи и се на владата на Република Македонија за поддршката на програмата на Хуавеи Seeds for the Future.

Главниот извршен директор на Хуавеи во Македонија Марин Тинчев ја истакна важноста на центрите за обука ширум светот на Хуавеи, како центри за трансфер на знаење и зголемување на ангажираноста на луѓето во дигиталното општество.

Инаку, петте најдобри студенти ќе имаат можност да бидат сведоци во демонстрацијата на најновите ИКТ достигнувања, да учествуваат во работилници каде што ќе се сретнат со високи извршни директори и експерти од Хуавеи. Исто така ќе посетат и часови по кинески јазик, кинеско сликање и калиграфија. Сите трошоци ќе бидат покриени од Хуавеи.