Ново ограничување на брзината од 30 километри на час е во сила во историскиот дел на Рим од јануари, а италијанската престолнина се придружи на голем број европски градови кои воведуваат забавен сообраќај во централните области за да ја зголемат безбедноста и да го намалат загадувањето.
Претходнoтo ограничување на брзината од 50 километри на час во тесни и прометни улици, преполни со жители, туристи и возила, е речиси преполовена. Градските власти наведуваат дека целта на оваа мерка е да се намали бројот на сообраќајни несреќи, но и да се намали нивото на бучава и емисиите на штетни гасови.
Градскиот секретар за транспорт Еугенио Патане изјави дека римските улици биле дизајнирани за различни времиња и различни сообраќајни навики.
– Градот каков што го знаеме денес не бил изграден за автомобили. Пониските брзини директно спасуваат животи – рече Патане, додавајќи дека пребрзото возење е вклучено во околу 7,5 проценти од сообраќајните несреќи во градот.
Новото ограничување ќе се спроведува постепено во текот на следните 30 дена за да им се овозможи на возачите да се прилагодат на промените. Во меѓувреме, градот го засили надзорот со инсталирање дополнителни камери за брзина.