
Генералниот секретар на Обединетите нации Антонио Гутереш објави дека му испратил на рускиот министер за надворешни работи Сергеј Лавров „сет конкретни предлози“ со цел заживување на договорот за жито.
„Верувам дека поднесовме предлог кој може да биде основа за реконструкција, но реконструкција која мора да биде стабилна“, рече Гутереш на прес-конференција, пренесува Ројтерс.
Тој додаде дека не може да има црноморска иницијатива која „се движи од криза во криза, од суспензија во суспензија“.
„Мораме да имаме нешто што функционира и работи за секого“, рече Гутереш.
Руските власти во јули објавија дека нема да го продолжат договорот за жито додека не се исполнат нивните барања.