Унгарската економија бележи пад во вториот квартал, а според првите проценки на централниот завод за статистика KSH, тоа е пад од 2,4 отсто на годишна основа.
Според сезонски приспособени и календарски податоци, објавени од KSH, бруто домашниот производ (БДП) паднал за 2,3 отсто во споредба со истиот период лани.
Заводот за статистика наведува дека индустријата и услужниот сектор најмногу придонеле за падот на активноста, пред сè транспортот, складирањето и трговијата, но дека падот го ублажила земјоделството.
Во однос на претходниот квартал, БДП падна за 0,3 отсто, четврти квартал по ред.
Коментирајќи ги овие податоци, Министерството за финансии во соопштението наведува дека унгарската економија ќе расте во втората половина од годината и дека следната година би можела да го надмине просекот на ЕУ, без оглед на војната во Украина и „бриселските санкции“.
Економските основи се стабилни, се вели во соопштението за печатот на Министерството, истакнувајќи ја рекордната вработеност и стапката на невработеност, која е меѓу најниските во ЕУ.
Покрај тоа, тие го издвојуваат силното земјоделство и надворешнотрговската размена и слабеењето на инфлацијата.
Во соопштението додаваат дека благодарение на владините мерки се очекува до крајот на годината стапката на инфлација да биде едноцифрена,пишува SEEbiz.
Во изјавата, министерот за економски развој, Мартон Наѓ, ја нагласи поврзаноста меѓу податоците за БДП и војната во Украина и санкциите, кои „предизвикаа пад на потрошувачката и забавување на инвестициите“. Меѓу другите надворешни влијанија е и стагнацијата на германската економија, рече тој.
Но, тој додаде дека податоците за вториот квартал го претставуваат „дното на негативниот економски циклус“ и дека економијата брзо ќе се врати на раст во третиот и четвртиот квартал. Тој ги истакна мноштвото нови странски инвестиции и високото ниво на вработеност, како и силното производство на возила и акумулатори и рапидно растечкиот извоз.
„Целта на владата е да избегне рецесија во текот на целата година, а планираше раст од четири проценти во 2024 година“, рече Наѓ.
