Жирито составено од 86 новинари од сите страни на светот на крајот избраа три возила коишто ќе се борат за престижната титула во финалето, а она што е најинтересно е што сите три автомобили кандидати за Светски автомобил на годината пристигнуваат од Далечниот Исток, со оглед на тоа дека во најтесниот избор влегоа: Mazda 3, Mazda CX-30 и Kia Telluride.
Освен најпрестижната, главна награда, на Светските автомобилски награди ќе се избираат победници и во уште четири категории. Така, во изборот за Светски градски автомобил на годината како финалисти влегоа: Kia Soul EV, Mini Electric и Volkswagen T-Cross. Кога станува збор за Светски луксузен автомобил на годината, финалисти се: Porsche 911, Mercedes EQC и Porsche Taycan.
За титулата меѓу перформансните автомобили ќе се натпреваруваат три модели на еден ист производител. Така, жирито ќе избира меѓу три модели на германски Porsche, а во игра се Porsche 911, Porsche 718 Spyder и Porsche Taycan. Кога станува збор за наградата за дизајн, истата ќе ја додели жирито составено од осум дизајнери, а финалисти во овој избор се Peugeot 208 којшто ја освои наградата Европски автомобил на годината, потоа Porsche Taycan и Mazda 3.
Последната област во којашто ќе се додели признание не се однесува на автомобилите, туку на личностите кои во голема мерка ѝ помогнале на автомобилската индустрија во изминатата година. Тука нема потесен избор, туку победникот ќе биде објавен на осми април на Салонот за автомобили во Њујорк, кога ќе бидат доделени и останатите награди.
Преземено од Avtoplus.mk
