Проектот Македонски почвен информациски систем ќе биде готов до јуни 2015

4

По извршените теренски наоди и истражувања и лабораториските анализи на собраните почвени профили, во моментов се работи на комплетирање на процесот на дигитализација на проектот Македонски почвен информациски систем.

Предвидените активности се очекува да завршат во определениот рок, до јуни 2015 година, информираа вчера експертите од  Факултетот за земјоделски науки и храна и Земјоделскиот институт на состанокот со министерот за земјоделство, шумарство и водостопанство Михаил Цветков, јавува Миа.

Проектот Македонски почвен информациски систем вреден 340.000 долари се спроведува со поддршка на Организацијата за храна и земјоделство на ОН (ФАО). Во реализацијата се вклучени и Македонската академија на науките и уметностите, Факултетот за шумарство, како и Природно-математичкиот факултет во координација со Министерството за земјоделство.

Системот ќе овозможи интеграција на почвите со други гранки во земјоделството и ќе биде основа за следење на промените како резултат на природен процес, интервенцијата на човекот и влијанието на климатските промени. На Министерството и на фармерите треба да им помогне во планирањето на видот и обемот на земјоделското производство, утврдувањето на погодните површини за засејување со одредени култури, одредувањето на ризикот од ерозија и суша, а ќе се користи и при развивање регионални планови за рурален развој.

Податоците од Македонскиот почвен информациски систем ќе бидат јавни и достапни до сите заинтересирани институции и поединци преку интернет страницата на Министерството.