Предложениот гасовод од Источен Медитеран (East Med) за испорака на природен гас од источниот Медитеран во Европа е премногу скап, не е економски исплатлив и ќе биде потребно предолго да се изгради, изјави заменик-државниот секретар на САД, Викторија Нуланд.
По разговорите со кипарскиот претседател Никос Анастасијадес, Нуланд рече дека земјите во регионот сфатиле дека зависноста од руската нафта и гас е исклучително лош облог по нејзината инвазија на Украина.
Таа рече дека предложениот проект за гасоводот East Med нема да може веднаш да испорача гас, кој сега и е потребен на Европа за брзо да стане независна од руската енергија, бидејќи ќе се одвива во многу длабоки води, а изградбата ќе трае повеќе од една деценија.
Идејата за гасоводот долг 1.900 километри од неодамна откриените локации во близина на Израел и Кипар произлезе пред неколку години меѓу земјите-членки на ЕУ, Грција и Кипар, чии лидери потпишаа договор во 2020 година да продолжат да го планираат.
Се чини дека приговорите на Нуланд го одложуваат проектот, а таа додаде дека САД и регионалните партнери, вклучително и Израел, Грција, Кипар и Турција, бараат алтернативни начини за носење гас на пазарот.