Се подготвуваат измени на Законот за извршување

21

zakon-pixabay

Фото: Pixabay

Се подготвуваат измени на Законот за извршување коишто од Комората на извршители најавуваат дека ќе бидат во насока на поголема ефикасност на извршувањето, јавува Миа.

Претседателот на Комората на извршители, Зоран Димов денеска изјави дека со Министерството за правда ќе работат на тоа законот во иднина да стане функционален и извршителите да бидат ефикасни, како што биле пред стапување во сила на законот што почна да се применува од оваа година.

“Со повеќе одредби што беа донесени во 2016 година, а почнаа да се применуваат во 2017 година, се воведоа некои институти што дотогаш не постоеја, а кои доведоа до успорување на извршувањето што, пак, значи зголемување на каматите на должниците“, рече Димов.

Во однос на тарифникот на извршителите, Димов вели дека имаат најниска тарифа, пониска и од адвокатите и од нотарите, но во следниот период треба да се организираат за сите услуги да бидат подостапни до граѓаните.

И претседателот на Комората на адвокати Никола Додовски вели дека нивните тарифи се најниски во регионот и за првпат по 25 години е зголемена тарифата, но многу помалку од она како што е предвидено во Законот за адвокатура.

“Во законот постои одредба дека адвокатските трошоци треба да се усогласуваат со трошоците на живот. 25 години тоа не е вршено“, изјави Додовски.