Трошоците на живот во февруари на исто ниво како претходниот месец

3

Трошоците на живот во февруари оваа година останаа на исто ниво во однос на претходниот месец, додека цените на мало бележат пораст од 0,1%, покажуваат податоците на Државниот завод за статистика.

Трошоците на животот во февруари 2015 година се на исто ниво како и претходниот месец, но е забележано движење во подгрупите. Пораст е забележан кај свежото овошје за 3,7%, свежиот зеленчук за 1,9%, сувото и конзервираното овошје за 1,4%, безалкохолните пијалаци за 1%, другите неспомнати прехранбени производи за 0,6%, шеќер, џем, мед, чоколада и кондиторски производи за 0,5%, свежото млеко за 0,4% и алкохолните пијалаци за 0,2%.

Исто така, пораст на индексот на трошоците на животот во февруари 2015 година, во споредба со претходниот месец, е забележан кај болничките услуги за 4,2%, лековите за 3%, текстилот за домаќинствата за 2,1%, авионскиот превоз на патници за 1,6%, гасот за домаќинствата за 1,1%, средствата за лична хигиена за 0,8%, средствата за чистење и одржување на станот за 0,6%, пијалаците во рестораните и хотелите и накитот и часовниците за 0,5%, услугите за одржување и поправки на станот за 0,4% и комуникациите за 0,2%.

Намалување на трошоците на животот во февруари 2015 година, во споредба со претходниот месец, е забележано кај месото за 1,3%, замрзнатиот зеленчук за 0.,6%, конзервираниот зеленчук за 0,4%,
тестенините за 0,3% и лебот и житариците за 0,2%. Намалување на индексите на трошоците на животот е забележано и кај течните горива за домаќинствата за 6,3%, обувките за 2,8%, сообраќајните средства за 2,6%, течните горива и мазива за 2,1% и облеката за 0,9%.

Трошоците на животот во февруари 2015 година, во споредба со февруари 2014 година, бележат
намалување од 1%, а цените на мало бележат намалување од 2,8%.