Цените на нафтата на светските берзи паднаа и минатата недела, петти пат по ред, бидејќи трговците стравуваат дека нова варијанта на коронавирусот може да предизвика повторно затворање на економиите, а со тоа и пад на побарувачката на нафта.
Цената на барелот на лондонскиот пазар минатата недела падна за околу 8 отсто, на 72,72 долари, додека на американскиот пазар барелот падна за 10,4 отсто на 68,15 долари. Ова е петта недела по ред како цените паѓаат, што не е забележано од март минатата година, а е резултат на остриот пад во петокот, по веста за појавата на новата варијанта на коронавирусот, наречена омикрон.
Само во петокот цените на барелот потонаа за повеќе од 11 отсто, што е нивен најголем дневен пад од април минатата година и падна на најниските нивоа во повеќе од два месеци. До петок, цените на нафтата се чинеше дека ќе ја прекинат четиринеделната негативна низа, но во петокот цените на барелот потонаа за повеќе од 10 долари бидејќи пазарот беше потресен од веста дека во Јужна Африка е идентификувана нова варијанта на коронавирус.
Се стравува дека варијантата омикрон би можела да биде отпорна на вакцини и позаразна од претходните варијанти на вируси. Како резултат на тоа, многу земји, вклучително ЕУ, Обединетото Кралство, САД и Бразил, најавија построги контроли на патувањата од шест јужноафрикански земји.
Ова ги вознемири инвеститорите кои веќе беа загрижени за брзото ширење на коронавирусот во Европа и повторното заклучување во некои земји, како Австрија. Сето ова може да го забави закрепнувањето на економиите од корона кризата и да предизвика пад на побарувачката на нафта.