Турција и Обединетите Арапски Емирати (ОАЕ) потпишаа 13 договори во вредност од 50,7 милијарди долари за време на посетата на турскиот претседател Реџеп Таип Ердоган на заливската земја.
Во соопштението се наведува дека двете страни постигнале договор за формирање на Стратешки совет на високо ниво, со кој ќе претседаваат претседателите на Турција и на ОАЕ.
Односите на Турција со Обединетите Арапски Емирати се издигнати на ниво на стратешко партнерство како резултат на договорот.
Страните, исто така, одлучија да ја унапредат постојната соработка во областите како што се енергијата, транспортот, инфраструктурата, логистиката, е-трговија, финансиите, здравството, храната, туризмот, недвижностите, градежништвото, одбранбената индустрија, вештачката интелигенција и напредните технологии.
Изразувајќи задоволство од развојот на блискиот дијалог и соработката на 50-годишнината од дипломатските односи со Обединетите Арапски Емирати, Ердоган рече дека Турција има за цел да ја зајакне правната инфраструктура во областите како промоција на инвестиции, безбедност, обновливи извори на енергија и транспорт.
Ердоган рече дека соработката меѓу двете земји дополнително ќе напредува на Меѓународниот саем за одбранбена индустрија (ИДЕФ) што ќе се одржи во Истанбул од 25 до 28 јули.
