Анкета спроведена на 4.000 испитаници покажува дека германските граѓани ја гледаат најголемата придобивка од вештачката интелигенција во заштедата на време и заштитата од измами, но се претпазливи кога станува збор за безбедноста на податоците и автоматското одобрување на кредити.
Многу банкарски клиенти во Германија генерално се отворени за употреба на вештачка интелигенција во финансиските услуги. Сепак, тие се доста исплашени од протекување на податоци, покажа анкетата.
Најголемата предност на вештачката интелигенција (ВИ) е заштедата на време, изјавиле 46,7 проценти од 4.000 испитаници во анкета на компанијата Civey.
Скоро исто толку, 45,6 проценти, се грижат за можно протекување на податоци.
Четири петтини рекле дека безбедноста на податоците е клучна ако ботовите се користат за банкарски или финансиски задачи.
Две третини, или 65,5 проценти, изјавиле дека би користеле алатки за ВИ кои ги предупредуваат ако се на работ да префрлат пари на измамник.
Повеќе од половина од испитаниците, 54,6 проценти, се подготвени да користат ВИ за да најдат начини да избегнат такси и трошоци.
Придобивката од вештачката интелигенција за анализа на трошењето и давање персонализирани совети за штедење беше издвоена од 51,8 проценти.
Мнозинството од испитаниците, исто така, рекоа дека прифаќаат помош од ботови за пополнување обрасци, што го посочија 55,1 проценти, или за собирање информации потребни за апликации, 52,8 проценти.
Сепак, само 37,7 проценти посочија дека би користеле целосно автоматизиран процес на кредитирање.
Спонзорите на анкетата рекоа дека ова веројатно се должи на страв од произволно или неправедно отфрлање на барањата.
Поддршката за вештачката интелигенција во процесот на одобрување кредити е 55,4 проценти доколку банкарските службеници ја проверат работата на ботот.
Анкетата за онлајн банкарство беше нарачана од технолошката фирма Соларис.