Владата донесе одлуки со кои се предвидува основање на две нови технолошко-индустриски развојни зони (ТИРЗ) во источна Македонија, од кои едната ќе биде лоцирана во близина на Виница, а другата кај Берово.
Зоната во Виница, како што најави денеска владиниот портпарол Александар Ѓорѓиев, ќе биде лоцирана во месноста викана Поповец на четири до пет километри од градот и ќе се протега на површина од 20 хектари. ТИРЗ Берово, пак, ќе биде на регионалниот пат Берово – Дабиле на јужниот излез од градот и ќе зафаќа површина од околу 17 хектари.
“Се очекува во текот на август да бидат распишани постапки (два посебни тендера) за изнаоѓање на економски оператор, односно компанија која ќе биде задолжена да ги изгради зоните во Виница и Берово“, рече портпаролот Ѓорѓиев.
Тој посочи дека во септември се очекува да почнат градежните активности во зоните, а најдоцнао до крајот на годинава да заврши првата фаза од изградбата на ТИРЗ Виница и ТИРЗ Берово и да се создадат услови да можат да се привлекуваат странски компании во рамки на зоните.
“Со нивната иградба се врши диверзификација на можностите и условите за привлекување странски компании и нивно лоцирање во источниот дел од Република Македонија што ќе биде од големо значење за локалниот економски развои и за зголемување на вработеноста. За завршетокот на првата фаза од градбата на двете зони се предвидени еден милион евра или по околу 500.000 евра за секоја посебно. Добро е македонските компании да земат учество на овие тендери и да се здобијат со можност да се вклучат во изградбата доколку ги исполнуваат условите“, рече Ѓорѓиев.
Во текот на наредниот месец се очекува да почнат градежните активности за изградба на ТИРЗ Струга на површина од 30 хектари и ТИРЗ Радовиш со околу 10 хектари, на која ќе биде поставен камен – темелник во текот на следните неколку дена. Во текот на минатата недела е распишан и тендер за избор на компанија која ќе ги изврши градежните активности за изградба на ТИРЗ Ранковце која се протега на 40 хектари.
“Со основањето на ТИРЗ Берово и ТИРЗ Виница и фазите за нивен почеток за градба и со почетокот на градба на ТИРЗ Радовиш и ТИРЗ Струга, како и со објавата на тендерот за изградба на ТИРЗ Ранковце веќе се заокружуваат 14 ТИРЗ од вкупно 15-те предвидени во Програмата за работа на Владата“, рече Ѓорѓиев.
Се очекува 15-тата зона да биде комплетирана до крајот на годинава, а треба да биде лоцирана во Делчево. Односно прво треба да биде деонесена одлуката за основање на ТИРЗ Делчево, да биде објавен тендер, да се избере компанија и да се отпочне со градба. До крајот на првиот квартал од идната година се очекува да биде звршена и првата фаза од ТИРЗ Делчево.
