Цените на акциите нагло паднаа на Волстрит во среда откако американската централна банка ги задржа каматните стапки непроменети и процени дека оваа година може да се очекува само едно намалување на каматните стапки поради високата инфлација.
Dow Jones падна за 1,63 проценти, на 46.225 поени, додека S&P 500 се лизна за 1,36 проценти, на 6.624 поени, а индексот Nasdaq за 1,46 проценти, на 22.152 поени.
Како што се очекуваше, по дводневната сесија, Фед одлучи да ги остави каматните стапки непроменети во опсег од 3,5 до 3,75 проценти.
Проценките на шефот на централната банка дека ќе ги намалат каматните стапки само еднаш оваа година и еднаш следната година останаа непроменети, што ги разочара инвеститорите кои се надеваа на намалување на каматните стапки во два или дури три наврати оваа година.
Во новите проценки, челниците на ФЕД малку ги зголемија проценките за економскиот раст и инфлацијата.
Неизвесни последици од кризата на Блискиот Исток
Во соопштението од седницата, ФЕД изјави дека последиците од конфликтот на Блискиот Исток за американската економија се неизвесни.
На прес-конференцијата, претседателот на ФЕД, Џером Пауел, истакна дека „инфлациските очекувања се зголемија во последните недели, што веројатно е последица на значителниот пораст на цените на нафтата поради прекините во снабдувањето на Блискиот Исток“.
Инвеститорите вчера беа разочарани и од фактот дека цените на производителите во САД пораснаа за 3,4 проценти во февруари, што е далеку над очекувањата на аналитичарите, што можеше да се почувствува и во растот на потрошувачките цени во наредните месеци.