Кон средината на овој месец во Јапонија беше објавен план, според кој познатиот производител на електроника Toshiba ќе биде поделен на три големи компании, од кои само една ќе продолжи да го носи досегашното име.
Тоа практично значи распаѓање на гигантот на јапонската електронска и електрична индустрија, кој во последните неколку години е во мака поради низа скандали и погрешни деловни потези, пишува РТС.
Во 2023 година, Toshiba треба да се подели на компанија која ќе биде специјализирана за електронски, дигитални и информациски работи поврзани со управувањето со инфраструктурата и сообраќајот, компанија чиј бизнис ќе биде поврзан со проводници, полупроводници, хард дискови и други електронски уреди и компанија која делумно ќе се занимава со полупроводници, а делумно со финансиски работи. Само последната ќе го задржат името Toshiba.
Треба да се каже дека Toshiba веќе продаде неколку свои фабрики за компјутери, телевизори и чипови и пред овој најнов развој, како и дека го ослободи својот посед поврзан со нуклеарната енергија во странство, што ги преполови приходите.
Според домашните експерти, непосредна причина за распаѓањето на групацијата Toshiba е интересот на нови големи акционери. Имено, во 2017 година, кога на Toshiba и се закануваше бришење од берзата поради два последователни квартали долг, тогашното раководство реши да не дозволи бришење за да ја зачува довербата на банките и другите доверители, па продаде голем број акции за да го надополни капиталот, поради што ја предаде моќта на одлучување на странски фондови и компании и практично ја загуби контролата врз иднината на конгломератот.
Овие нови акционери, кои внесоа околу 6 милијарди долари, беа незадоволни од работата на менаџментот, неговата неможност да претстави нова визија за развој и да постигне синергија на различни компании во рамките на конгломератот.
Меѓу другото, тие побараа продажба на некои делови од групацијата, како што се фирмите кои се занимаваат со производство и сервисирање на лифтови и семафори, што не беше сторено.
Затоа, бидејќи имаат за цел да ја вратат инвестицијата што е можно поскоро и не се заинтересирани да чекаат подолг период Toshiba полека да закрепне и повторно да почне да расте, решиле да побараат нејзино расцепување, односно да се обидат да заработат преку продажба на одредени сегменти на Toshiba и брзо зголемување на пазарната вредност, (а подоцна и тргување со акции) на оние компоненти во нејзиниот сегашен состав кои сè уште се финансиски здрави или перспективни.