Минатата година, 76,1 процент (197,7 милиони луѓе) од жителите на Европската Унија на возраст од 20 до 64 години биле вработени, што е највисок удел забележан од почетокот на временската серија во 2009 година.
Стапката на вработеност се зголемила за 0,3 процентни поени (п.п.) во споредба со 2024 година и за 0,8 п.п. во споредба со 2023 година, соопшти Европската канцеларија за статистика.
Меѓу земјите од ЕУ, највисоки стапки на вработеност се забележани во Малта (83,6 проценти), Холандија (83,4) и Чешка (82,9 проценти). Најниски стапки се забележани во Италија (67,6 проценти), Романија (69,0 проценти) и Грција (71,0 проценти).
Во сите земји од ЕУ, освен Литванија, мажите имале повисока стапка на вработеност од жените во 2025 година.
Стапката на вработеност на мажите во ЕУ била 80,9 проценти. Меѓу земјите од ЕУ, највисоки стапки се регистрирани во Малта (89,1 проценти), Чешка (88,2 проценти) и Холандија (87,2 проценти), додека најниски стапки се регистрирани во Белгија (76,4 проценти), Хрватска (76,8 проценти) и Финска (77,0 проценти).
За жените во ЕУ, стапката на вработеност била 71,3 проценти, а највисоко ниво е регистрирано во Естонија (81,4 проценти), Литванија (80,3 проценти) и Шведска (79,8 проценти). Најниски стапки се регистрирани во Италија (58,0 проценти), Романија (59,5 проценти) и Грција (62,3 проценти).
Разликата во стапките на вработеност помеѓу мажите и жените во ЕУ изнесуваше 9,6 процентни поени. Најголеми разлики во стапките на вработеност се регистрирани во Италија (19,1 п.п.), Романија (18,7 п.п.) и Грција (17,4 п.п.), додека најмали разлики се регистрирани во Естонија (0,5 п.п.), Литванија (-0,6 п.п.), Финска (1,3 п.п.) и Латвија (1,9 п.п.).