Најновите податоци од Регистарот на цени и закупнини при Агенцијата за катастар на недвижности откриваат значително забавување на пазарот во првите три месеци од 2026 година. Иако бројот на продажби на станови, куќи и деловни простори бележи пад во споредба со крајот на минатата година, градежниот сектор смета дека е прерано за заклучоци.
Во регистарот на цени и закупнини на Агенцијата за катастар на недвижностите во првите три месеци од годинава регистрирани се 712 новоизградени стана, односно станови од инвеститор, што е за 292 стана или -29 проценти помалку во споредба со четвртиот квартал од минатата година. Во Агенцијата за катастар на недвижностите досега се запишани 28.013 листа за предбележување градба, што укажува дека овие објекти се во фаза на градба и набргу ќе се најдат на пазарот на недвижности.
Компаративно со четвртиот квартал од 2025 година, бројот на продадени станови во првиот кавртал од 2026 година е намален за 27 проценти, а нивната вкупна финансиска вредност е намалена за 23 проценти. За 23 проценти е намален и бројот на продадени куќи, a пад на квартално ниво има и кај продажбата на земјоделско земјиште и шуми за 8 проценти, како и кај продадените деловни простори за 11 отсто.
Според претседателот на Здружението за градежништво во Стопанската комора на Македонија, Андреја Серафимовски, е прерано да се носат заклучоци за идното движење на цените на недвижностите.
Во гостување во „Топ Тема“ , Серафимовски оцени дека период од три месеци не е доволен за да се прогнозира дали цените ќе продолжат да растат или ќе се стабилизираат.
„Краток е периодот од три месеци во кој ние можеме да заклучиме или да дадеме било каква насока за тоа како ќе се движи оваа година или во наредниот период цената на становите, каков ќе биде амбиентот и кои се цените кои ќе достигнат максимум. Се работи за три месеци, а ние имаме тренд од пет години на зголемување на цените на становите. Период од три месеци спореден со квартал кој не е ист по години не ни дава никаква слика, ниту пак мене ми дава заклучок дека нешто можеме да третираме и прогнозираме“, изјави Серафимовски.
Тој посочи дека главниот фактор за растот на цените и понатаму е односот меѓу понудата и побарувачката, нагласувајќи дека во изминатиот период интересот за купување бил значително поголем од бројот на достапни станови.
„Во пазарна економија примарно е односот меѓу понудата и побарувачката. Досега, до последниот квартал, имавме многу поголема побарувачка од понуда, па затоа цените на становите ги достигнуваа максимумите. Населението бараше да купи повеќе станови, а во општините каде што имаше најголема побарувачка, едноставно немаше доволно станови на пазарот“, рече Серафимовски.