На Волстрит во среда, индексот Dow Jones порасна поради силата на цените на акциите во секторите за авијација и туризам, додека S&P 500 падна поради слабоста во технолошкиот сектор.
Индексот Dow Jones порасна за 0,35 проценти, на 51.848 поени, додека S&P 500 се лизна за 0,10 проценти, на 7.358 поени, а Nasdaq за 0,43 проценти, на 25.476 поени.
Падот на S&P 500 и индексот Nasdaq се должи на слабоста во технолошкиот сектор, бидејќи инвеститорите стравуваат дека цените на акциите во тој сектор се превисоки.
Затоа, тие не сакаа да преземаат ризици пред објавувањето на кварталните деловни резултати на „Микрон Технолоџи“. Цената на акциите на тој производител на компјутерски мемории скокна за повеќе од 200 проценти од почетокот на годината, па резултатите треба да покажат дали таков раст е оправдан.
Индексот Dow Jones сепак порасна, благодарение на падот на цените на нафтата на најниските нивоа од почетокот на војната меѓу САД и Иран, со оглед на тоа што по договореното примирје сè повеќе танкери минуваат низ Ормутскиот теснец, клучен премин за извоз на нафта од Блискиот Исток.
Поради падот на цените на нафтата, цените на акциите во секторите за авијација и туризам нагло пораснаа.
Најголемата берза во светот е исто така претпазлива бидејќи во четврток ќе биде објавен нов извештај за инфлацијата во САД, што би можело да влијае на очекувањата во врска со каматните стапки.
Бидејќи неодамна објавените податоци покажаа дека инфлацијата е на највисоко ниво во последните три години, пазарот проценува дека американската централна банка ќе ги зголеми клучните каматни стапки барем еднаш оваа година за 0,25 процентни поени, а можеби и двапати.
И на повеќето европски берзи, цените на акциите вчера пораснаа. Лондонскиот индекс FTSE зајакна за 0,31 процент, на 10.461 поен, а парискиот CAC се зголеми за 0,54 проценти, на 8.385 поени. Франкфуртскиот DAX, од друга страна, се лизна за 0,62 проценти, на 24.740 поени.