Вештачката интелигенција им нуди на земјите во развој историска можност да постигнат за само десет години напредок за кој претходно би им требало еден век, проценува Светската банка во нов извештај.
Институцијата предупредува дека брзината на усвојување на оваа технологија ќе биде клучна за земјите со ниски и средни приходи да не пропуштат единствена можност за развој.
Според проценките на Светската банка, вештачката интелигенција би можела да го зголеми потенцијалниот годишен економски раст на земјите во развој од 4,1 на 4,9 проценти во текот на оваа деценија, додека во развиените економии овој раст би бил помеѓу 1,2 и 3,6 проценти.
Наместо да развиваат свои модели на вештачка интелигенција во голем обем, што е скапо и технолошки барано, се препорачува земјите во развој прво да ги усвојат постојните решенија, да ги прилагодат на локалните потреби и дури потоа да развијат свои технологии.
Извештајот нагласува дека придобивките од вештачката интелигенција не бараат нужно огромни инвестиции.
Поточно, потенцијалот на таканаречените „мали вештачки интелигенции“, или апликации што можат да функционираат во средини со ограничен пристап до интернет и електрична енергија.
Ваквите решенија можат значително да го подобрат здравството, образованието, земјоделството и јавната администрација.
Како успешни примери, Светската банка наведува тутор по математика во Гана, достапен преку СМС пораки на обични мобилни телефони, кој за само пет долари по ученик постигнал резултати споредливи со осуммесечен курс.
Во Бангладеш, систем базиран на вештачка интелигенција го зголеми бројот на дневни прегледани пациенти со дијабетична ретинопатија за 40 проценти, додека во Индија, системите за временска прогноза со вештачка интелигенција им помогнаа на земјоделците да ги намалат трошоците и да ја зголемат ефикасноста.
Посебната важност на вештачката интелигенција, се наведува во извештајот, се одразува во фактот дека таа може да го компензира недостатокот на стручен кадар во области како што се здравството, образованието, земјоделството и јавната администрација.
Во исто време, ризикот од автоматизација на работните места во земјите во развој е значително помал отколку во богатите земји.
Се проценува дека генеративната вештачка интелигенција може да загрози 4,5 проценти од работните места во земјите со пониски приходи, во споредба со 14,2 проценти во развиените економии.
Покрај тоа, околу 16,2 проценти од работните места во земјите во развој би можеле да имаат корист од зголемувањето на продуктивноста овозможено од вештачката интелигенција, што е речиси исто како и во развиените земји каде што бројката е 18,7 проценти, вели Светската банка на својата веб-страница.
Сепак, организацијата предупредува дека вештачката интелигенција не е без ризици, додавајќи дека вештачката интелигенција може да го прошири јазот меѓу богатите и сиромашните земји, дополнително да ја концентрира технолошката моќ во рацете на неколку компании и да ја зголеми зависноста од ограничен број добавувачи.
Затоа, банката ги повикува земјите во развој брзо да воведат технологии за вештачка интелигенција, а истовремено да развијат соодветни заштитни мерки и услови што ќе ги максимизираат придобивките и ќе ги минимизираат потенцијалните негативни ефекти.