Унапредувањето на работното место значи признание за целиот труд, време, енергија и нерви што сте ги потрошиле додека сте ги извршувале задачите и сте ги решавале сите предизвици.
Но, за да дојдете до посакуваната унапредена позиција потребно е многу да вложувате во себе, во своето знаење и стручност, но и откако ќе го добиете треба да се грижите да ја задржите позицијата. Многумина велат дека патот до врвот е тежок, но уште потешко е да се одржи. За да не “прегорите“ од работа одржувајќи се на новоосвоениот “врв“, еве неколку совети:
Поставете граница
Ако сте дошле на нова и поодговорна позиција, тоа не значи дека не треба главата да ја “извадите“ од компјутерот или документите. Поставете си граница, добро организирајте се и побарајте поддршка од колегите. Тимскиот пристап ќе покаже дека не сте ги заборавиле колегите, туку активно ги вклучувате во сите задачи. Не треба да плашите дека ако не работите по 10 часа, ќе ја изневерите довербата на тие што ви ја укажале. Напротив, ако се тормозите, може само да си направите лоша услуга, да станете поанксиозни и да си ја доведете репутацијата во прашање.
Не ја работете работата на другите
Иако сте унапредени и имате поголеми обврски, но и овластувања, не се изложувајте на непотребни задачи. Споделете ги активностите со колегите, така ќе им докажете дека им верувате и дека не сте од оние кои се “сами свои шефови“ само кога се заслугите во прашање, туку сите предизвици и успеси што ги носи работата.
Не ги слушајте злобните коментари
Не само да не ги слушате, туку и не им обрнувајте внимание на лошите коментари кога знаете дека сте заслужни за добиеното напредување. Понекогаш луѓето знаат да бидат себични и да не сакаат да се израдуваат на успесите на колегите. За нив, вашето унапредување е само вашата поголема плата, но ги занемаруваат сите жртвувања и посветеност на работата зад кои што стоите.
Поврзете се со другите менаџери на вашето ниво
Така полесно ќе остварите соработка, тие ќе споделат одредени совети од лично искуство што би ви помогнале полесно да се снајдете во новата средина. Комуникацијата со нив ќе ви го олесни пристапот до сите потребни информации и документи за да имате увид во работата.
Изградете сопствен менаџерски стил
Иако теоријата препознава различни стилови на управување, вие раководете се според вашето знаење, искуство, карактер и вештини… така ќе успеете да изградите однос кон работата, колегите, претпоставените, соработниците… Не се обидувајте да пресликате или ископирате нечиј стил на управување, бидејќи така полесно ќе направите некоја грешка.
Фото: Pexels
