Францускиот „Хермес“, една од најпрофитабилните и најотпорни компании во луксузната индустрија, го забележа својот најслаб квартален раст на продажбата од почетокот на 2020 година.
Приходите достигнаа 4,1 милијарди евра во третиот квартал, што претставува зголемување од 4,3 проценти при константен девизен курс, но помалку од 5,2 проценти што ги очекуваа аналитичарите.
Забавувањето е особено изразено во Кина, која до неодамна беше еден од главните двигатели на растот на европските луксузни куќи. Додека продажбата на кожни производи од „Хермес“ порасна за 10,8 проценти, приходите од облека и додатоци се намалија за два проценти, прв пат по повеќегодишен период на раст.
Финансискиот директор на компанијата, Ерик ду Халгуе, изјави дека падот во тој сегмент е последица на послабата продажба во Кина, додека раст е забележан и на други пазари.
Резултатите покажуваат дека дури и „Хермес“, чиј бизнис модел се базира на ексклузивност, високи цени и ограничена достапност на производи, не е имун на промените во навиките на потрошувачите.
За разлика од конкурентските луксузни куќи кои ја зголемија продажбата во последните години со проширување на својата понуда и потпирање повеќе на кинеските потрошувачи, „Хермес“ одржува строга контрола врз производството и дистрибуцијата. Побарувачката за неговите најпознати чанти „Биркин“ и „Кели“ продолжува да ја надминува понудата, дозволувајќи ѝ на компанијата да одржува високи цени и маржи на профит.
Притисок врз целата луксузна индустрија
Проблемите на кинескиот пазар долго време го оптоваруваа работењето на големите европски производители на луксузни стоки, вклучувајќи го и LVMH, сопственик на брендовите Louis Vuitton и Dior.
Послабата доверба на потрошувачите и попретпазливото трошење го отежнуваат враќањето на стапките на раст што ги постигна индустријата пред неколку години.
Досега, Hermès се истакнуваше благодарение на својата концентрација на најбогатите клиенти и производи чија достапност е намерно ограничена. Токму затоа неговото забавување има дополнителна тежина за секторот. Тоа покажува дека проблемите на кинескиот пазар повеќе не се ограничени на луксузните компании со поголема масовна дистрибуција.
Промената во очекувањата веќе имаше силно влијание врз берзата. Акциите на Hermès изгубија околу 36 проценти од својата вредност од почетокот на годината, и покрај тоа што компанијата продолжува да расте со приходите.
Таквиот пад ги одразува и високите очекувања вградени во цената на акциите. Инвеститорите со години се подготвени да платат значително повеќе за Хермес поради неговиот постојан раст, силната профитабилност и отпорноста на неговите најпознати производи. Кога растот се забавува, пазарната проценка на компанијата е под притисок, дури и ако бизнисот остане профитабилен.
Засега, Хермес не ја менува својата фундаментална стратегија и планира да го зголеми обемот на производство за приближно шест проценти годишно. На овој начин, се обидува да задоволи дел од побарувачката без да ја наруши ексклузивноста врз која се темели вредноста на брендот.