Глобалните пазари наскоро би можеле да се „судрат со реалноста“ по неуморниот раст оваа година, предупредија во вторникот инвестициските банки „Голдман Сакс“ и „Морган Стенли“, порачувајќи им на инвеститорите да се подготват за пад во следните две години, пишува CNBC.
Акциите низ целиот свет рушат рекорди – поттикнати од растот поврзан со вештачката интелигенција и очекувањата за пониски каматни стапки. Во текот на изминатиот месец, клучните американски индекси на берзата достигнаа нови максимуми; јапонскиот Nikkei 225 и јужнокорејскиот Kospi достигнаа највисоки нивоа во историјата, додека кинескиот Shanghai Composite достигна својата најсилна вредност во последната деценија благодарение на ублажувањето на тензиите меѓу САД и Кина и слабеењето на доларот.
„Многу е веројатно дека пазарите на акции ќе се корегираат за 10 до 20 проценти во следните 12 до 24 месеци“, рече извршниот директор на Goldman Sachs, Дејвид Соломон, на Инвестицискиот самит на глобалните финансиски лидери во Хонг Конг. „Пазарите одат нагоре, а потоа се повлекуваат за инвеститорите да можат повторно да ја проценат ситуацијата.“
Соломон нагласи дека ваквите падови се нормален дел од долгорочните циклуси нагоре и дека препораката на банката останува иста – да се продолжат инвестициите и редовно да се прегледува нивната распределба, наместо да се обидува да се „погоди“ моментот на пазарот, пишува Форбс.
„Пад од 10 до 15 проценти се случува често, дури и за време на позитивни пазарни циклуси“, рече тој. „Тоа не треба да го промени вашиот фундаментален поглед на тоа како го распределувате капиталот“.
Извршниот директор на „Морган Стенли“, Тед Пик, кој зборуваше на истиот панел, додаде дека инвеститорите треба да ги поздрават ваквите повремени корекции, бидејќи тие се „здрави“ за пазарот, а не знаци на криза.
„Можноста за корекции од 10 до 15 проценти кои не се предизвикани од некаков макроекономски шок треба да биде добредојдена“, рече Пик.
Позициите на „Соломонс“ и „Пик“ следат по неодамнешните предупредувања на ММФ за можна остра корекција на пазарот, како и пораките од претседателот на Федералните резерви, Џером Пауел, и гувернерот на Банката на Англија, Ендру Бејли, за пренадуените вредности на акциите.
Двете банки ја гледаат Азија како светла точка во наредните години, особено по неодамнешните позитивни случувања како што е новиот трговски договор меѓу САД и Кина. „Голдман Сакс“ очекува дека глобалните инвеститори ќе продолжат да покажуваат интерес за Кина, нагласувајќи дека таа останува „една од најголемите и најважните светски економии“.
„Морган Стенли“ одржува позитивен став за Хонг Конг, Кина, Јапонија и Индија поради нивните специфични развојни приказни. Реформите во корпоративното управување во Јапонија и инвестициите во инфраструктурата во Индија се истакнуваат како долгорочни инвестициски теми.
Фото: Pixabay