Советот за унапредување и надзор на ревизијата на Република Македонија ја прошири својата меѓународна соработка со уште една земја членка на Европската унија, пишува Миа.
Претседателот на Советот за унапредување и надзор на ревизијата на Република Македонија, Соња Ѓелова – Стојанова и претседателот на Хрватскиот комитет за јавен надзор на ревизијата Жељко Фабер во Загреб потпишаа Меморандум за соработка.
Како што информираат, оваа соработка ќе се остварува преку развој на заеднички проекти користејќи ги Твининг и Таиекс програмите на Европската унија во насока на јакнење на системот за јавен надзор на ревизијата во двете земји. Вработените во двете земји ќе разменуваат искуства, знаења и вештини во таа насока.
Претседателот на Хрватскиот комитет за јавен надзор на ревизијата беше позитивно изненаден од досегашните постигнувања на Советот за унапредување и надзор на ревизијата на Република Македонија во релативно краткиот временски период од неговото основање и ја истакна нивната поддршка како земја членка во ЕУ за зачленување на Советот за унапредување и надзор на ревизијата на Република Македонија во меѓународните организации како што се ИФИАР и ЕГАОБ.
